सिन्धुलीको गोलन्जर गाउँपालिकाका एकै परिवारका १६ जना सदस्य रहस्यमयरूपमा सम्पर्कविहीन भएका छन् ।
गोलन्जर गाउँपालिका– ६ कि उर्मिला हायुको परिवारका १६ सदस्य रहस्यमयरूपमा बेपत्ता भएका गाउँपालिकाका अध्यक्ष शंकरराज बरालले सूत्र न्युजलाई जानकारी दिए ।
जंगलको बिचमा घर भएको र कहिलेबाट सम्पर्कविहीन भए भन्ने नखुलेको उनले बताए । ‘शुक्रबार वा शनिबारबाट उनीहरु सम्पर्कविहीन भएको अनुमान गरिएको छ,’ उनले सूत्र न्युजलाई भने, ‘अरुले आज (सोमबार) थाहा पाएका हुन् । यसपछि हामीलाई खबर आयो । अहिले प्रहरी त्यहाँ (उर्मिलाको घर भएको स्थान) पुगेको छ ।’
हायु सीमान्तकृत समुदायमा पर्छ । राज्यले उनीहरुलाई जनही मासिक ४ हजारका दरले भत्ता उपलब्ध गराउने गरेको छ । उनीहरु १६ जनाले ३ महिनाको १ लाख ९२ हजार भत्ता बुझेका थिए ।
त्यसपछि उनीहरु सम्पर्कविहीन भएका हुन् । ‘उनीहरुले करिब २ लाख सामाजिक सुरक्षा भत्ता बुझेका थिए । त्यसपछि उनीहरु बेपत्ता भएका हुन्,’ अध्यक्ष बरालले भने, ‘उनीहरु कतै गएका हुन् वा केही भएको हो, यसबारे बुझ्ने काम भइरहेको छ ।’
